IPM Oʻzbekistonda. O‘simliklarni uyg‘un himoy qilish bo‘yicha Toshkentda oʻtkazilgan treningning natijalari

01:30 / 14.03.2023
#

“Oʻsimliklarni uygʻunlashgan himoya qilish” tushunchasi Yevropada va boshqa rivojlangan davlatlarda koʻp yillardan buyon mashhur. Qishloq xoʻjaligida bu texnologiyadan foydalanib, tabiatni, ekin yerining ahvolini yaxshilash, kimyoviy moddalarni kamaytirish, oziq-ovqatning sifati va xavfsizligini oshirish bu tushunchaning asosidir.

 

Afsuski, Oʻzbekistonda kimyoviy moddalardan nazoratsiz foydalanish holatlari koʻp uchraydi. Sovet davridan qolgan bu amaliyot tuproqning unumdorligini pasaytirib, ekologiya ifloslanishiga, insonlar, hayvonlar va oʻsimliklar salomatligiga xavf soladi. Shu tufayli Oʻzbekistonga ham OʻUHQ tushunchasi kirib keldi. U mamlakatda qishloq xoʻjaligidagi vaziyatni yaxshilashga yordam beradi.

 

Bugungi kunda Oʻzbekiston hukumati OʻUHQni joriy etishga eʼtibor qaratmoqda. Qishloq xoʻjaligini rivojlantirishning 2020-2030-yillarga moʻljallangan strategiyasida bu koʻzda tutilgan. Mana shu hujjatdagi vazifalarni bajarish maqsadida 2022-yil dekabrida Yevropa Ittifoqining ASK dasturi va Britaniyaning CABI tashkiloti yordamida, NRI tabiat tadqiqoti instituti hamkorligida oʻquv treningi oʻtkazildi.

 

Ikki hafta davom etgan treningni qishloq xoʻjaligida 40 yillik tajribaga ega ekspertlar Xans Dobson va Manfred Grossrider olib bordi. Tadbirda turli tashkilotlarning ilmiy xodimlari, shuningdek, sohada mustaqil ishlaydigan fermerlar va mutaxassislar qatnashdi. Jami 30 dan ortiq ishtirokchi bu mavzuda yangi bilimlarga ega boʻldi, yevropalik hamkasblarining tajribasini oʻrgandi.

 

Bunday treninglar va tadbirlar oʻtkazilishi qishloq xoʻjaligida ishlaydigan oʻzbekistonliklarga bu sohadagi bilimlarini oshirishga yordam berib kelmoqda. Ularga qisqa vaqtda qishloq xoʻjaligida bilim va innovatsiyalar haqida maʼlumot berilib, sertifikatlar topshirilmoqda. Ishtirokchilar bu bilimlardan oʻz ishida, kasbida foydalana boshlasa, Oʻzbekiston qishloq xoʻjaligiga kimyoviy moddalar keltiradigan zarar sezilarli kamayishi kutilmoqda.